Venerabilibus ac religiosis in Christo patribus et fratribus, domno Thome abbati, Johanni priori totique conventui monasterii sancti Kiliani in Lambaco, ordinis sancti Benedicti, Pataviensis diocesis. Nos, fratres Martinus abbas, Erhardus prior, totusque conventus utriusque sexus monasterii sancte Marie virginis in Gottwicho, ordinis et diocesis eorundem, cum sincere caritatis affectu salutem in Domino perhenniter adipisci. Quia, mediante caritate, que vinculum perfectionis ab apostolo predicatur, membra singula in corpore sancte ecclesie sibi invicem coniunguntur et Christo, suo capiti, ad participienda per ipsum et in ipso gratiarum spiritualium influentiam uniuntur, tanto liberius atque libentius sinum caritatis in ampliande confraternitatis consortium dilatamus, quanto ad participationem fructus huiusmodi ferventius anhelamus. Unde, vestrarum caritatum literis ac religiositate moti, matura deliberatione prehabita, plene fraternitatis bonorum, scilicet omnium consortium et communionem in missis, orationibus, elemosinis, abstinentiis et vigiliis ac aliis virtutum exerciciis, que divina clementia per nos, presentes, et successores nostros in dicto monasterio Gottwicensi dignabitur operari, vobis ac successoribus vestris libere concedimus et impartimur, in vita pariter et in morte. Contractamque vel potius renovatam fraternitatem huiusmodi tenore presentium roboramus. Adicientes, quod, cum obitus fratris unius vel plurium predicti monasterii vestri professi vel professorum nobis intimatus fuerit, vigilias et missam defunctorum iuxta consuetudinem nostri monasterii persolvemus. Sed et singuli sacerdotes missas legentes singulas missas, clerici vero missas non legentes officium defunctorum totum, vesperas scilicet et vigilias novem lectionum cum laudibus, conversi quoque centum Pater noster cum totidem Ave Maria in remedium animarum earundem dicent. In quorum omnium testimonium et robur hanc paginam sigillis nostris munitam prefatis confratribus nostris tradere decrevimus et exhibere. Datum in dicto nostro monasterio Gottwicensi, undecima die mensis Iunii, anno Domini millesimo quadringentesimo quinquagesimo nono.