Wir Thoman von Gotes gnaden abbt ze Lambach bekennen mit dem brief, das fur uns komen ist Michel Teufel und hat mit wolbedachtem mut und gutem willen recht und redleichen verkaufft den gledt und gledstat in unnserm purkchfrid am Stadel gelegen zwischen Petern Kaufinger seligen gled, haws, hofstat, hofmarch und der Schernpergerinn gledt, und hat den ze kauffen gegeben Hannsen Schachen zu Gmunden und allen seinn eriben umb ain suma geltz, der er gantz ausgericht und beczalt worden ist zu rechtten tagen an allen schaden. Also haben wir im dem vorberurten Schachen und allen sein eriben den obgemeltten gledt mit aller seiner zugehorung bestett und verlichen, was wir in rechtleichen daran bestetten und verleichen sullen oder mugen, doch das man uns und unnserm gotchaus all jar jarleichen davon raichen und diemn sol nach lautt und innhaltung unnsers gotshaus urbarpuch und als von altter herkomen ist. Es ist der obgenant Michel Tewfel und all sein eriben des obgenanten gledt mit aller seiner zugehorung des bemeltten Hannsen Schachen und aller seiner eriben rechtt gwern und furstandt fur all rechtleichew ansprach, wo und wann in des not und durft beschiecht mit dem rechten, als dann solh kauffs und lanndes ob der Enns recht ist. Wir offen, das sy kainerlai wanndlung damit nicht haben sullen, sunnder uns und unnserm gotshaus damit gehorsam sein als gepurleichen davon ze tunn ist unverczigen unnsers gotshauss rechten in allen sachen. Mit urkund des briefs, den wir in also darumb geben, besigelt mit unnserm anhanngundem insigel. Geben als man zalt nach Kristi geburde in dem vierczechenhundertundnewnundfunnffczigistem jare an phinntztag nagt vor sannd Jorigentag des heiligen ritter.