Venerabilibus ac religiosis in Christo patribus et dominis domino Thome abbati, Johanni priori totique conventui monasterii sancti Kyliani in Lambaco ordinis sancti Benedicti Pataviensis dyocesis, nos Leonhardus Dei gracia prepositus, Wolfgangus decanus totusque conventus monasterii sancti Thome apostoli in Voraw ordinis sancti Augustini canonicorum regularium Saltzeburgensis dyocesis, cum sincere caritatis affectu salutem in Domino perhenniter adipisci. Quia mediante caritate, que vinculum perfeccionis ab apostolo predicatur, membra singula in corpore sancte ecclesie sibi invicem coniunguntur ac Christo suo capiti ad percipiendam per ipsum et in Christo gratiarum spiritualium influenciam uniuntur, tanto liberius atque libencius sinum caritatis in ampliande confraternitatis consorcium dilatamus, quanto ad participationem fructus huiusmodi fervencius anhelamus. Unde vestrarum caritatum precibus ac religiositate moti, matura deliberatione prehabita, plene confraternitatis bonorum scilicet omnium consortium et communionem in missis, orationibus, elemosinis, abstinenciis et vigiliis ac aliis virtutum exerciciis, que divina clementia per presentes nos et successores nostros in dicto nostro monasterio Vorauiensi dignabitur operari, vobis ac successoribus vestris tenere presencium in vita pariter et in morte libere concedimus. Adicientes nichilominus, quod cum obitus fratris unius aut plurium predicti monasterii vestri professi vel professorum nobis intimatus fuerit, vigilias et missam defunctorum iuxta consuetudinem nostri monasterii persolvemus, nominaque eorundem nostris annalibus inscribemus. Sed et singuli sacerdotes missas legentes singulas missas, clerici vero missas non legentes officium defunctorum totum, vesperas scilicet et vigilias novem leccionum cum laudibus, conversi quoque centum Pater noster cum totidem Ave Maria in remedium animarum eorundem dicent. In quorum omnium testimonium et robur hanc paginam sigillis nostris munitam vobis prefatis confratribus nostris tradere decrevimus. Datum in monasterio nostro Voraro anno Domini millesimo quadringentesimo quinquagesimo nono, Dominica qua cantatur Reminiscere.