Pius episcopus servus servorum Dei. Dilecto filio abbati monasterii in Lambach ordinis sancti Benedicti Pataviensis diocesis, salutem et apostolicam benedictionem. Exposcit tue devocionis sinceritas et religionis promeretur honestas, ut tam te, quem speciali dilectione prosequimur, quam monasterium tuum dignis honoribus attollamus. Hinc est quod nos, dilecti filii Alberti ducis Austrie pro te nobis super hoc humiliter supplicantis ac tuis in hac parte supplicacionibus inclinati, ut tu et successores tui abbates dicti monasterii, qui pro tempore fuerint, mitra, annulo et aliis pontificalibus insigniis intra septa monasterii libere possitis uti, necnon quod benedictionem solemnem post missarum vesperorum et matutinarum solempnia, dummodo in benedictione huiusmodi aliquis antistes vel sedis apostolice legatus presens non fuerit, elargiri valeatis. Felicis recordacionis Alexandri pape IIII predecessoris nostri, que incipit abbatis, et aliis quibuscunque constitucionibus apostolicis in contrarium editis nequaquam obstantibus, tibi et eisdem successoribus auctoritate apostolica de speciali gracia tenore presencium indulgemus. Nulli ergo omnino hominum liceat hanc paginam nostre concessionis infringere vel ei ausu temerario contraire. Si quis autem hoc attemptare presumpserit, indignacionem omnipotentis Dei et beatorum Petri et Pauli apostolorum eius se noverit incursurum. Datum Senis anno incarnacionis dominice millesimo quadringentesimo quinquagesimo octavo, pridie nonas Marcii, pontificatus nostri anno primo.