Wir Thoman von Gottes genaden abbt ze Lambach bekennen mit dem brief, das fur uns komen ist Jorig Holderl am Stadel yetz gesessen und hat mit wolbedachtem mut und gutem willen recht und redleichen abtreten und ubergeben seinem lieben aydem und tochtter Jacoben dem Enngewglein, seiner hausfrawn Barbara und allen iren erben des haws halbs mit aller seiner zugehorung unndtter dem Perig in unnserm purkchfrid am Stadel gelegen, den anndern halben tail habent sew vor kawfleichen in ir gwaltsam bracht. Also haben wir in den vorgenanten und vorberurten dem Jacoben Enngewglein, seiner benanten hausfraun und allen iren erben das obgenant haws, hofstat, hofmarich mit aller zugehorung bestett und verlichen, was wir in rechtleichen daran bestetten und verleichen sullen oder mugen, doch daz man uns und unnserm gotshaus all jar jarleichen ze purkchrecht davon raichen und dienn sol zu sannd Michelstag vierczechen Wienner phening und auch sunnder zu sannd Jorigentag drey schilling phenning umb ainn jartag, den man in bey unnserer pharrkirchen darumben begeen sol. Es ist auch der obgenant Jorig Holderl und all sein erben des obgemeltten hawss, hofstat, hofmarich mit aller seiner zugehorung gleich halbs der vorberurten Jacoben Enngewgleins, seiner hawsfrawn und aller irer eriben rechtt gwern und furstandt fur all rechtleichew ansprach, wo und wann ir des not und durft beschiecht mit dem rechten, als soleichs abtretens, ubergebens und lanndes ob der Enns recht ist. Wir offen auch, das sy kainerlay wanndlung damit nicht haben sullen in kainerlay weis an unnser handt und gutem willen, und sullen uns auch alles das davon leyden und dulden, das annder unnser und unnsers gotshauss lewt gesessen in unnserm purkchfrid am Stadel gein uns leyden und duldent unverczigen unnsers gotshauss rechten in allen sachen. Ze urkund geben wir in des also den offenn brief, besigeltem mit unnserm anhanngundem insigel. Geben als man zalt nach Kristi geburd in dem vierczechenhunndertundachttundfunnffczigisten jaren an suntag nach sannd Erasem tag.