Udalricus Dei gratia episcopus Pataviensis dilecto in Christo N. rectori parrochialis ecclesie in Gerungs aut eius locumtenenti nostre diocesis salutem in Domino. Quia ad ecclesiam parrochialem sancti Nicolai in Obernkirchen eiusdem nostre diocesis vacantem ad presens per resignacionem liberam dilecti in Christo fidelis Wilhelmi Swalb notarii nostri vice et procuratorio nomine dilecti in Christo Alberti novissimi et inmediati rectoris eiusdem in manibus nostris factam atque per nos receptam et admissam dilectum in Christo Martinum Dienstman presbyterum dicte nostre diocesis ad presentacionem venerabilis devoti in Christo sincere dilecti Thome abbatis monasterii Lambacensis ordinis sancti Benedicti prefate nostre diocesis, ad quem ius presentandi pertinere dinoscitur rectorem instituimus per presentes ipsumque per libri tradicionem, ut est moris, presentialiter investivimus de eadem curam animarum atque administracionem spiritualium et temporalium in ea sibi plenarie comittentes. Quare tibi in virtute sancte obediencie firmiter et districte precipientes mandamus quatenus antedictum Martinum aut eius in hac parte legittimum procuratorem in et ad prenominate ecclesie sancti Nicolai corporalem possessionem iuriumque et pertinentiarum enim eiusdem inducas et inductum defendas faciasque sibi de fructibus redditibus proventibus iuribus et obvencionibus universis ad eandem ecclesiam spectantibus ab omnibus, quorum interest integre responderi, contradictores et rebelles quoscumque auctoritate nostra per censuram ecclesiasticam firmiter compescendo. Datum Patavie vigesimo die mensis aprilis anno Domini millesimo quadringentesimo quinquagesimo octavo.