Reverendis in Christo patribus et domnis domno Thome abbati Johanni priori totique conventui monasterii sancti Kyliani in Lambaco, ordinis sancti Benedicti, Pataviensis diocesis nos Symon prepositus, Johannes decanus totusque conventus beate ac gloriosissime virginis Marie in Newnburga klaustrali ordinis sanctissimi patris nostri Augustini prefate diocesis. Cum oracionum munere utinam Deo devotarum illud glutinum caritatis, quod de multorum cordibus facit unum, quanto spiritus humani dignitas suo preeminet corpori ac eterna transsitoriis gaudiis merito preferuntur, tanto gaudio pleniori noster spiritus in Deo exultavit pro oblatis spiritualibus beneficiis per vos ac literas vestras patentes nobis transmissas ipsi qui concordiam facit in suis subliminibus gracias multiplices referentes. Ne autem per ingratitudinem, que fontem pietatis exssicat videamur delinquere et quodammodo a racionis tramite deviare vestris reverenciis tamquam confratribus nostris dilectissimis quasi pro multis pauca pro maximis minima hoc est participacionem universorum bonorum operum que divina pietas per nos et successores nostros in monasterio nostro Newnburgensi operari dignabitur in missis oracionibus elemosinis, abstinenciis ac aliis spiritualibus exercitiis quorumcunque nominibus censeantur vobis ac successoribus vestris tenore presencium libere concedimus in vita pariter et in morte adicientes ut cum aliquis fratrum vestrorum vocante Domino decesserit, eiusdem nobis nuncciato obitu animam ipsius iuxta laudabilem conswetudinem nostri monasterii cum vigiliis ac missarum solempniis et psalmis verba mea etc. in capitulo commendalitur fidelium omnium redemptori, sed et singuli sacerdotes missas legentes singulas missas clerici vero ac sanctimoniales missas non legentes officium defunctorum totum vesperas scilicet et vigilias novem leccionum cum laudibus, conversi quoque et converse centum pater noster cum totidem ave Maria in remedium animarum eorundem dicent. Et si obitus plurimorum fratrum vestrorum uno tempore nobis intimati fuerint, tantum faciemus pro eis in plurali, quantum pro uno solo facere decrevimus in singulari. Nomina eciam ipsorum nostris annalibus mortuorum libris asscribimus. In quorum testimonium et robur hanc paginam sigillis nostris munitam vobis prefatis fratribus nostris assignare decrevimus. Datum in monasteryo nostro prefato anno Domini millesimo quadringentesimo quinquagesimo septimo die vero mensis octobris duodecima.