Wir Thoman von Gottes genaden abbt ze Lambach bekennen mit dem brief, das fur uns komen sind Genngel von Stainfelden anstat seiner swester Kathrein, Horman des Allramsperger seligen witib, so ist selbs persondlich vor unns gewesen Margreth der vorbenanten Kathrein tochtter und habent also mit wolbedachtem mut und gutem willen recht und redleich verkaufft das gut ze Allramsperg gelegen in Kirichdorffer pharr geleich halbs mit aller zugehorung irm lieben aydem, swager, tochtter und swester Wolfgang dem Grymssen, seiner hausfrawn Anna und irn baiden erben umb ain sum geltz, der sew gantz und gar ausgerichtt und beczalt worden sind zu rechtten tagen an allen schaden zu irm halben tail gutz, das sew vor auch innhaben nach lautt irs gutz. Also haben wir im dem yetz benanten Grymssen, seiner hausfrawn und irn baiden erben das obgenant gut gleich halbs mit aller zugehorung bestett und verlichen, was wir in rechtleichen daran bestetten und verleichen sullen oder mugen, doch das man uns und unnserm gotshaus all jar jarleichen davon raichen und dienn sol von gantzem gut zu unnser lieben frawntag des dienstzeit sechczigk Wienner phenning, zu dem Prehentag zwaintzigk Wienner phenning ze pawsteur, zu sannd Jorigentag zechen Wienner phenning ze vogtsteur. Es sind auch dy obgenanten Kathrei und anstat ir, ir brueder Wolfganng, auch Margreth der Kathrein tochtter und irer aller eriben des obgenanten gutz halbs mit aller seiner zugehorung des bemeltten Wolfgang Grymssen, seiner hausfrawn Anna und irer baider erben ir rechtt gwern und furstannd fur all rechtleichew ansprach, wo und wann in des not und durft beschiecht mit dem rechten, als dann soleichs kauffs und lanndes ob der Enns recht ist. Wir offen auch, das sy kainerlay wanndlung damit nicht haben sullen in kainerlay weis an unnser handt und gutem willen, und sullen uns auch alles das davon leyden und duldent unverczigen unnsers gotshauss rechten in allen sachen. Ze urkund geben wir in des also den offenn brief, besigeltem mit unnserm anhangundem insigel. Geben als man zalt nach Kristi geburde in dem vierczechenhunndertundsibenundfunnffczigisten jaren an suntag nagst vor sannd Luceintag.