Wir Thoman von Gottes genaden abbt ze Lambach bekennen mit dem brief, das fur uns komen sind Anna, des Kristann Puechegkker hausfraw, auch Peter Puchegker und Margreth irew kinnder, und habent mit wolbedachtem mut und gutem willen recht und redleichen verkaufft das gut am Kogel mit aller seiner zugehorung, gelegen in Kirichaimer pharr und erbrecht ist von uns und unnserm gotshaus, des wir unnderweist worden seinn mit briefleicher urkund, ausganngen von unnserm vorsedel abbt Jacoben seliger gedachtnuss, und habent daz ze kauffen gegeben Hannsen dem Slager, seiner hausfrawn Anna und allen iren eriben umb ain sum gelcz, der sew gantz und gar ausgerichtt und beczalt worden seinn zu rechtten tagen an allen schaden. Also haben wir im dem yetz bemeltten Hannsen Slager, seiner hausfrawn und allen iren eriben das obgenant gut mit aller seiner zugehorung bestett und verlichen, was wir in rechtleichen daran bestetten und verleichen sullen oder mugen, doch das man uns und unnserm gotshaus all jar jarleichen davon raichen und dienn sol nach lautt und sag unnsers gotshauss urbarpuch. Es sind auch dy oberurten Anna Puchegkerinn und irew kinnder Peter, auch Margreth und irer aller eriben des obgemeltten gutz mit aller seiner zugehorung des vorberurten Hannsen Slager, seiner hausfrawn und aller irer eriben rechtt gewern und furstandt fur all rechtleiche ansprach, wo und wann in des not und durft beschiecht mit dem rechten, als dann soleichs kauffs und lanndes ob der Enns recht ist. Wir offen auch, das sy kainerlay wanndlung damit haben sullen in kainerlay weis an unnser handt und gutem willen, und sullen uns auch alles das davon leyden und dulden, das annder unnser und unsers gotshauss erbler gein uns leydent und duldent, auch stiftleich und pewleichen legen und halten und sunnder mit ainer behausung bei peen irer gerechtikait, auch mit ainem holden oder mit in selbs, treuleich und ungeverleichen unverczigen unnsers gotshaus rechten in allen sachen. Ze urkund geben wir in des also den offenn brief, besigeltem mit unnserm anhanngundem insigel. Geben als man zalt nach Kristi geburde in dem virczechenhunndertundsibenundfunnffczigisten jaren an sambstag vor sannd Urbanstag des heiligen babsts.