Wir Thoman von Gottes genaden abbt ze Lambach bekennen mit dem brief, das uns mit ainem besigeltem aufgabbrieve aufgesanndt habent Hainreich Staudinger burger ze Wels und sein hausfraw Kathrey, so ist auch persondleich fur uns komen der Staudinger und habent also mit wolbedachtem mut und gutem willen recht und redleichen verkaufft ain tagwerich wismad in der Furtwis und ain viertail in der pewnt dabey gelegen in Welser pharr, und erbrecht ist von uns und unnserm gotshaus und habent dy ze kauffen gegeben Hannsen Kolmann burger ze Wels und alln seinn erben umb ain sum gelcz, der sew gantz und gar ausgerichtt und beczalt worden sinnd zu rechtten tagen an allen schaden. Also haben wir im dem benanten Hannsen Kolman und alln seinn erben das vorberurt tagwerich wismad und viertail in der pewnten yedcz mit aller seiner zugehorung bestett und verlichen, was wir in rechtleichen daran bestetten und verleichen sullen oder mugen, doch das man uns und unnserm gotshaus all jar jarleichen davon raichen und dienn sol vom tagwerich wismad zu unnser lieben frawntag der dienstzeit drey Wienner phenning und von dem virtail in der pewnten ainn helbing. Es sinnd auch die obgenanten Hainreich Staudinger, sein hausfraw Kathrei und irer baider erben des obgenanten tagwerich wismad und des virtails in der pewnten, yedes mit aller seiner zuegehorung des berurten Hannsen Kolman und aller seiner erben rechtt gwern und furstandt fur all rechtleichew ansprach, wo und wann in des not und durft beschiecht mit dem rechten, als dann solhs kauffs und lanndes ob der Enns recht ist. Wir melden auch, das sy kainerlay wanndlung damit nicht haben sullen in kainerlay weis an unnser hanndt und gutem willen, und sullen uns auch alles das davon leyden und dulden, das annder unnsers gotshaus erbler gein uns leydent und duldent unverczigen unnsers gotshauss rechten in allen sachen. Ze urkund geben wir in des also den offenn brief, besigeltem mit unnserm anhanngunndem insigel. Geben als man zalt nach Kristi gepurde in dem vierczechenhunndertundfunfundfunnffczigisten jaren an eritag an sannd Erasemtag des heiligen bischolve.