Wir Thoman von Gottes genaden abbt ze Lambach bekennen mit dem brieve, das fur uns komen ist Jorig Swerczwadel, burger ze Wels, und hat uns furbracht ainen aufgabbrief von seiner hausfrawn Anna, und habent also mit wolbedachtem mut und gutem willen recht und redleichen verkaufft ain viertail an der wisen, genant die Furtwisen, und ain viertail an der pewnten dabei zenagst dem Grunpach gelegen in Welser pharr und kawfleichen in ir gwalt bracht habent von Dorothea, Ulreichs von Holtzarn und diezeit Stephann des Gaubinger hausfraw und von Micheln, Ulreichs von Holtzarn und der vorberurten Dorothea sun, und anstat irer, irs kindts und geswistredts Margrethen, das zu denselben zeiten nicht vogtper gewesen ist, der wir vormallen underweist worden sein mit briefleicher urkund ausganngen von unnserm vorsedel abbt Johannsen seliger gedachtnuss, und habent das nun ze kauffen gegeben Hannsen Kolman, auch burger ze Wels, und allen seinn erben umb ain sum gelcz, der sew gantz und gar ausgericht und beczalt worden sind zu rechtten tagen an allen schaden. Also haben wir im dem yetz benanten Hannsen Kolman und allen seinn erben das obgenant viertail an wisen und pewnten mit aller zugehorung bestett und verlichen, was wir in rechtleichen daran bestetten und verleichen sulln oder mugen, doch das man uns und unnserm gotshaus sol all jar jarleichen davon raichen und dienn nach innhaltung unnsers gotshauss urbarpuch lautt und sag. Es sind auch dy obgenanten Jorig Swertzwadel, sein hausfraw Anna und irer baider erben des obenanten viertail an wisen und pewnten mit aller zugehorung des berurten Hannsen Kolman und aller seiner erben rechtt gewern und furstandt fur all rechtleiche ansprach, wo und wann in des not und durfft beschiecht mit dem rechten, als dann soleichs kauffs und lanndes ob der Enns recht ist. Wir offen auch, das sy kainerlay wanndlung damit nicht haben sullen in kainerlay weis an unnser handt und gutem willen, und sullen uns auch alles davon leiden und dulden an alle widerred mit stewr und alles annderr handlung, auch damit trew gehorsam und gwerttig sein als annder unnsers gotshauss erbler angever unverczigen unnsers gotshauss rechten in allen sachen. Ze urkund geben wir in des also den offenn brief, besigeltem mit unnserm anhanngundem insigel. Geben als man zalt nach Kristi geburde in dem vierzechenhunndertundvierundfunnffczigisten jaren an mitichen nach Mathie apostoli.