Wir Thoman von Gottes genaden abbt ze Lambach bekennen mit dem brief, das fur uns komen ist Wolfganng, Kuntzen ze Oberndorff weylandt seligen sun, und hat mit wolbedachtem mut und guten willen recht und redleichen gemachtt und geben seiner lieben eeleichen hausfrawn Margrethen achtt phundt phening zu rechtter morigengab nach dem lanndesrechten ob der Enns auf seinem gleichen erbtail auf dem gut ze Oberndorff, da der Hausrugkel seliger aufgesessen ist. Also haben wir ir der obgenanten Margrethen das benant ir gemachtt auf des berurten irs mann erbschaft und gerechtikait auf dem vorgemeltten gut bestett und verlichen, was wir ir rechtleichen daran bestetten und verleichen sullen oder mugen, doch das man uns und unnserm gotshaus all jar jarleichen davon raichen und dienn sol nach innhaltung des erbbriefs, so uber das obenant gut ist lautt und sag. Es ist auch der obgenant Wolfganng und all sein erben des obenanten gemachts, morigengab auf seiner erbschaft und gerechtikait auf dem oberurten gut der bemeltten seiner hausfrawn Margrethen rechtt gwern und furstandt fur all rechtleichew ansprach, wo und wann ir des not und durfft beschiecht mit dem rechten, als dann soleichs gemachts, morigengab und lanndes ob der Enns recht ist. Wir offen auch, das sy kainerlay wanndlung damit nicht haben sulln in kainerlay weis an unnser hanndt und gutem willen, und sullen uns auch alles das davon leyden und dulden, das annder unnsers gotshauss erbler gein uns leydent und duldent unverczigen unnsers gotshauss rechten in allen sachen. Ze urkund geben wir in des also den offenn brief, besigeltem mit unnserm anhanngundem insigel. Geben als man zalt nach Kristi geburde in dem vierczechenhunndertunddreynundfunnffczigisten jaren an suntag an sannd Kathreintag.