Wir Thoman von Gottes genaden abbt ze Lambach bekennen mit dem brief, das fur uns komen sind Mertt, unnser hofsneider, sein hausfraw Kathrey und habent mit wolbedachtem mut und guetem willen recht und redleichen verkaufft das haws, hofstat, hofmarch, gelegen hie in unnserm markcht und purkchfrid zwischen der Teurbanger und hern Augusten hewsern und hofsteten und kawfleichen in ir gwalt bracht habent von irn gesweyn, gesweyinn, bruder und swestern Micheln dem Hintter, Barbara der Messerin ze Wels seligen, auch Lipplein den dreyn geswistreden anstat irer als der eltern geswistreden und fur iren jungerew geswistred Paulein, Hennslein, Barbara, Magdalen habent sew sich angenomen. Dann ain tail ist der obgenanten Kathrein rechtz vaterleichs erb gewesen und habent das also ze kawffen gegeben Jacoben dem Pinter, seiner hausfrawn Margrethen und irn baiden erben umb ain sum geltz, der sew gantz und gar ausgericht und beczalt worden sind zu rechtten tagen an allen schaden. Also haben wir in den yetz benanten dem Jacoben Pinter, seiner hausfrawn und irn baiden erben das obenant haus, hofstat, hofmarch mit aller zugehorung bestett und verlichen, was wir in rechtleichen daran bestetten und verleichen sullen oder mugen, doch das man uns und unnserm gotshaus all jar jarleichen davon raichen und dienn sol nach innhaltung unnsers gotshaus urbarpuch. Es sind auch dye obgenanten Mertt, sein hausfraw Kathrey und irer baider erben des obenanten hauss, hofstat, hofmarich mit aller zugehorung des vorberurten Jacoben Pinter, seiner hausfrawn und irer baider erben rechtt gwern und fuerstand fur all rechtleiche ansprach, wo und wann in des not und durft beschiecht mit dem rechten, als solhs kauffs und lanndes ob der Enns recht ist. Sy sullen auch kainerlay wanndlung damit nicht haben an unnser hannd und gutem willen und alles das gein uns leiden und dulden, als annder unnsers gotshauss lewt hie angever. Ze urkund geben wir in des also den offenn brief, besigeltem mit unnserm anhanngundem insigel. Geben als man zalt nach Kristi geburde in dem vierczechenhundertunddreinundfunffczigisten jaren an eritag vor Lucie virginis.