Wir Thoman von Gottes genaden abbt ze Lambach bekennen mit dem brief, das fur uns komen ist Hanns Heresinger zu Wels und hat uns furbracht von des Vischlechen wegen in der Rosenaw ob der Hagmul gelegen in Welser pharr, wie das mit spruch und taidingen aus seiner gwalt in Wolfganng des Rechwannger und seiner erben gwalt gesprochen und getaidingt sey durch frum lewt edel und annder, das uns und unnserm gotshaus dienstper ist mit zechen pfenning geltz jarleicher gult. Darauf hat uns der obgenant Hanns Heresinnger vleiss gebeten, das wir das gemeltt lechen mit aller zugehorung nun geruchten zu bestetten und verleichen dem obenanten Rechwannger und allen seinn eriben, das wir also getan haben und auch tunn wissentleichen in kraft des briefs, was wir in rechtleichen daran bestetten und verleichen sulln oder mugen, doch das man uns und unnserm gotshaus all jar jarleichen davon raichen und dienn sol zu unnser lieben frawntag der dienstzeit den obenanten dienst nach innhaltung des briefs uns von dem berurten Rechwannger darumben gegeben unverczigen unnsers gotshauss rechten in allen sachen. Ze urkund geben wir in des also den offenn brief, besigeltem mit unnserm anhanngundem insigel. Geben als man zalt nach Kristi geburde in dem vierczechenhunndertundzwaynundfunnfczigisten jaren an mantag vor Jacobi apostoli.