Wir Thoman von Gottes genaden abbt ze Lambach bekennen mit dem brieve, das uns an ainem aufgabrief aufgesanndt habent Niclas Grabschoph, auch Hanns, Wolfganng und Thomann, drew geswistred gebrueder dy Sluchtel, darinn vleiss gebeten, daz wir irr lieben muemen Annen, Lienharten des Lechner weilandt burger ze Wels seligen witiben und iren eriben zway drittail wismadtz, so sew gehabt haben an der wisen zwischen des Sumpperhofs wisen und der Guphinn wisen, und dy herget von dem Kursenphenning und der Yllsunnginn, gelegen datz den Aichen niderhalben Winntpassing bei dem Grunpach in Welser pharr und erbrecht ist von uns und unserm gotshaus, geruchten zu bestetten und verleichen, wann sew in dy kawfleichen zu kauffen gegeben haben umb ain sum geltz, der sew gantz und gar ausgerichtt und beczalt worden seinn zu rechtten tagen an allen schaden. Also haben wir ir, der benanten Anna und allen irn eriben nach solicher vorberurten aufgab und pet dy gemeltten zway tagwerich wismad mit aller zugehorung bestett und verlichen, was wir in rechtleichen daran [bestetten] und verleichen sulln oder mugen, doch das man uns und unserm gotshaus all jar jarleichen davon raichen [und dienn sulln] zu unser lieben frawntag der dienstzeit funffczechen Wienner phenning. Es sind auch die obgenanten Niklas Grab[scho]ph, Hanns, Wolfganng, Thoman, gebruder und all ir eriben der obenanten zwayer tagwerich wismad mit aller irr zugehorung der vorberurten Anna Lechnerinn und aller irr eriben rechtt gwern und furstanndt fur all rechtleichew ansprach, wo und wann in des not und durft beschiecht mit dem rechten, als dann soleichs kaufs und lanndes ob der Enns recht ist. Wir offen auch, das sy kainerlay wanndlung damit nicht haben sullen in kainerlay weis an unser hanndt und gutem willen, und sullen uns auch alles das davon leiden und dulden, das annder unsers gotshauss eribler gein uns leident und duldent unverczigen unsers gotshauss rechten in allen sachen. Ze urkund geben wir in des also den offenn brief, besigeltem mit unserm anhanngunndem insigel. Geben als man zalt nach Kristi geburde in dem vierczechenhunndertundainsundfunffczigisten jaren an mitichen nach Georii.