Wir Thoman von Gottes genaden abbt ze Lambach bekennen mit dem brief, das fur uns komen ist Peter Slesier und hat mit wolbedachtem mut und gutem willen recht und redleichen verkaufft das haws, hofstat, hofmarich mit aller zuegehorung, gelegen hie in unserm markcht und purkchfrid ze Lambach undter der Lewtten, undtter des Paul Reindleins aydem haws und hofstat, und hat das ze kauffen gegeben Micheln dem Fleischakcher, seiner hausfrawn Margrethen und irn baiden eriben umb ain sum gelts, der er gantz und gar ausgerichtt und beczalt worden ist zu rechtten tagen an allen schaden. Also haben wir im, dem yetz benanten Micheln, seiner hausfrawn und irn baiden erben das gemeltt haws, hofstat, hofmarich mit aller zuegehorung bestett und verlichen, was wir in rechtleichen daran bestetten und verleichen sulln oder mugen, doch das man uns und unserm gotshaus all jar jarleichen davon raichen und dienn sol nach lautt und innhaltung unsers gotshauss urbar[puch]. Es ist auch der obgenant Peter Slesier und all sein eriben des obenanten haws, hofstat, hofmarich mit aller zugehorung des vorberurten Micheln, seiner hausfrawn und irer baider eriben rechtt gwern und furstanndt fur all rechtleichew ansprach, wo und wann in des not und durfft beschiecht mit dem rechten, als dann soleichs kaufs und lanndes ob der Enns recht ist. Wir offen auch, das sy kainerlay wanndlung damit nicht haben sulln in kainerlay weis an unser hanndt und gutem willen, und sulln uns auch alles das davon leyden und dulden, das annder unsers gotshauss lewt gesessen hie in unserm markcht und purkchfrid gein uns leydent und duldent unverczigen unsers gotshauss rechten in allen sachen. Ze urkund geben wir in des also den offenn brief, besigeltem mit unserm anhanngunndem insigel. Geben als man zalt nach Kristi geburde in dem vierczechenhunndertundainsundfunffczigisten jaren an eritag nach Judica in der vasten vor dem heiligen pluem ostertag.