Nicolaus miseratione divina titulo sancti Petri ad vincula sacrosancte Romane ecclesie presbyter cardinalis, apostolice sedis per Alemaniam legatus, universis et singulis christifidelibus salutem in Domino sempiternam. Splendor paterne glorie, qui sua mundum illuminat ineffabili claritate pia vota fidelium de ipsius clementissima maiestate et misericordia sperantium tunc precipue benigno favore prosequitur cum devota ipsorum humilitas sanctorum precibus et meritis adiuvatur, cupientes igitur ut ecclesia parrochialis sancti Johannis Baptiste in Lambaco, Pataviensis diocesis congruis honoribus frequentetur fidelesque ipsi eo libencius devocionis causa confluant ad eandem quo inibi dono celestis gracie uberius conspexerint se refectos de omnipotentis Dei misericordia ac beatorum Petri et Pauli apostolorum eius meritis et auctoritate confisi omnibus vere penitentibus et confessis, qui in nativitatis, circumcisionis, epiphanie, resurrectionis, ascensionis et corporis Domini nostri Jesu Christi ac penthecostes, necnon nativitatis, purificationis, annunciacionis, assumpcionisque beate Marie virginis et nativitatis beati Johannis Baptiste, dictorum Petri et Pauli apostolorum necnon ipsius ecclesie dedicacionis et patroni festivitatibus celebritate quoque omnium sanctorum eandem ecclesiam devote visitaverint et divinis interfuerint ibidem atque de bonis sibi a Deo collatis pro eiusdem ecclesie structura et ipsius ornamentorum augmento et reparacione manus porrexerint adiutrices, centum dies et de iniunctis eis penitenciis misericorditer in Domino relaxamus presentibus perpetuo duraturis. Datum in Lambaco Pataviensis diocesis sub nostro sigillo die martis nona mensis marcii anno a nativitate Domini millesimo quadringentesimo quinquagesimoprimo pontificatus sanctissimi in Christo patris ac domni nostri domni Nicolai divina providencia pape quinti anno quarto.