Leonardus Dei gracia episcopus Pataviensis universis et singulis christifidelibus presentes nostras litteras inspecturis salutem in Domino sempiternam. Cupientes christifideles indulgenciarum largicionibus et peccatorum remissionibus ad zelum devocionis et pietatis, quibus divine reddantur gracie apciores fervencius incitare, nos omnibus vere penitentibus et confessis, qui ecclesiam parrochialem sancti Johannis Baptiste in Lambach nostre diocesis in festivitatibus infrascriptis videlicet nativitatis Domini, pasce, ascensionis, penthecostes, corporis Christi, omnibus festivitatibus gloriosissime virginis Marie, omnium apostolorum ac festo omnium sanctorum et in conmemoracione omnium fidelium animarum diebus quoque dedicacionum et patronorum dicte ecclesie causa devocionis visitaverint aut qui ad luminaria tempore divinorum sew ad ipsius ecclesie reparacionem manus porrexerint adiutrices, de omnipotentis Dei misericordia et beatorum Petri et Pauli apostolorum ipsorum confisi suffragiis quadraginta dies indulgenciarum misericorditer in Domino elargimur perpetuis temporibus duraturis harum testimonio litterarum. Datum in castro nostro montis sancti Georii supra Pataviam vigesimatercia die mensis iulii anno Domini millesmo quadringentesimo quinquagesimo.