Wir Thoman von Gottes genaden abbt ze Lambach bekennen mit dem brieve, das fur uns komen ist Hanns Hofinger zu Hofing und hat mit wolbedachtem mut und gutem willen recht und redleichen verkaufft ainen drittail an der Haselpewnt gelegen in Gaspaltshover phar, und hat den ze kauffen gegeben seinem lieben swager und muemen Micheln dem Smid ze Horipach, seiner hausfrawn Magdalena und irn baiden eriben umb ain sum geltz, der er gantz und gar ausgericht und beczalt worden ist zu rechtten tagen an allen schaden. Also haben wir im dem yetz benanten Micheln Smid, seiner hausfrawn und irn baiden eriben den gemeltten drittail an der berurten Haselpewnt mit aller zugehorung bestett und verlichen, was wir in rechtleichen daran bestetten und verleichen sulln oder mugen, doch das man uns und unserm gotshaus all jar jarleichen davon raichen und dienn sol nach innhaltung des eribbriefs, so uber dy gemeltten Haselpewnten ist lautt und sag. Es ist auch der obgemeltt Hanns Hofinger und all sein eriben der benanten drittail mit aller zugehorung an der berurten Haselpewnt des gemeltten Micheln, seiner hausfrawn und irer baider eriben rechtt gwern und furstanndt fur all rechtleiche ansprach, wo und wann in des not und durfft beschiecht mit dem rechten, als dann soleichs kaufs, erbrechtz und lanndes ob der Enns recht ist. Wir offen auch, das sy kainerlay wanndlung damit nicht haben sullen in kainerlay weis an unser hanndt und gutem willen, und sulln uns auch alles das davon leyden und dulden, das annder unsers gotshauss erbler gein uns leydent und duldent unverczigen unsers gotshauss rechten in allen sachen. Ze urkund geben wir in des also den offenn brief, besigeltem mit unserm anhanngundem insigel. Geben als man zalt nach Kristi geburde in dem vierczechenhundertundnewnundvierczigisten jaren an freitag nagst nach sannd Leonhartstag des heiligen peichtinnger.