Venerabilibus ac religiosis in Christo patribus et fratribus domno Thome abbati totique conventui monasterii in Lambaco, ordinis sancti Benedicti, Pataviensis diocesis, nos fratres Jacobus abbas, Ulricus prior totusque conventus monasterii sancti Agapiti martiris in Krembsmunster, ordinis et diocesis eorundem, cum sincere caritatis affectu salutem in Domino perhenniter adipisci. Quia mediante caritate, que vinculum perfectionis ab apostolo predicatur membra singula in corpore sancte ecclesie sibi invicem coniunguntur et Christo suo capiti ad percipiendam per ipsum et in ipso graciarum spiritualium influenciam uniuntur, tanto liberius atque libencius synum caritatis in ampliande confraternitatis consorcium dilatamus, quanto ad participacionem fructus huiusmodi fervencius anhelamus, unde vestrarum karitatum precibus et religiositate moti matura deliberacione prehabita plene confraternitatis bonorum scilicet omnium consorcium et communionem in missis, oracionibus, elemosinis, abstinenciis et vigiliis ac aliis virtutum exerciciis, que divina clemencia per presentes nos et successores nostros in dicto Chrembsmonasterio dignabitur operari vobis ac successoribus vestris tenore presencium libere concedimus adicientes, quod cum obitus fratris unius vel plurium predicti monasterii vestri professi vel professorum nobis intimatus fuerit, vigilias et missam defunctorum iuxta conswetudinem nostri monasterii persolvemus, sed et singuli sacerdotes missas legentes singulas missas, clerici vero missas non legentes officium defunctorum totum, vesperas scilicet et vigilias novem lectionum cum laudibus, conversi quoque centum Pater Noster cum totidem Ave Maria in remedium animarum eorundem dicent. In quorum omnium testimonium et robur hanc paginam sigillis nostris munitam prefatis fratribus nostris tradere decrevimus. Datum in nostro monasterio Chrembsmunster anno Domini millesimo quadringentesimo quadragesimonono nona die mensis aprilis.