Venerabilibus ac religiosis in Christo patribus et fratribus domno Thome abbati totique conventui monasterii in Lambach, ordinis sancti Benedicti Pataviensis dyocesis, nos fratres Caspar abbas, Conradus prior totusque conventus monasterii in Tegernsee ordinis eiusdem, Frisingensis dyocesis, cum sincero caritatis affectu salutem in Domino perhenniter adipisci. Quia mediante caritate, que vinculum perfectionis ab appostolo predicatur, membra singula in corpore sancte ecclesie sibi invicem coniunguntur et Christo suo capiti ad percipiendam per ipsum et in ipso gratiarum spiritualium influenciam uniuntur, tanto liberius atque libentius sinum caritatis in ampliande confraternitatis consortium dilatamus, quanto ad participationem fructus huiusmodi ferventius anhelamus. Unde vestrarum caritatum precibus ac religiositate moti matura deliberacione prehabita plene confraternitatis bonorum scilicet omnium consorcium et communionem in missis, oracionibus, elemosinis, abstinentiis et vigiliis ac aliis virtutum exerciciis, que divina clemencia per presentes nos et successores nostros in dicto monasterio Tegernseensi dignabitur operari vobis ac successoribus vestris tenore presentium libere concedimus adicientes, quod cum obitus fratris unius vel plurium predicti monasterii vestri professi vel professorum nobis intimatus fuerit, vigilias et missam defunctorum iuxta consuetudinem nostri monasterii persolvemus, sed et singuli sacerdotes missas legentes singulas missas, clerici vero missas non legentes officium defunctorum totum vesperas scilicet et vigilias novem lectionum cum laudibus, conversi quoque quinqueginta Pater Noster et totidem Ave Marie in remedium animarum eorundem dicent. In quorum omnium testimonium et robur hanc paginam sigillis nostris munitam prefatis fratribus nostris tradere decrevimus. Datum in monasterio nostro prenominato in die sancte Cecilie virginis et martiris anno Domini millesimoquadringentesimo quadragesimooctavo.