Wir Thoman von Gottes genaden abbt ze Lambach bekennen mit dem brief, das fur uns komen ist Mertt Kefer und hat mit wolbedachtem mut und guetem willen recht und redleichen verkaufft die halben hub genant die Tanczhub, gelegen im Niderndorff im Sulczpach in Puchler pharr und erbrecht ist von uns und unserm gotshaus, Lienharten von Kappellen, des Ottleins daselbs seligen sun, seiner hausfrawn Klarein und irn baiden erben umb funffunddreissigkch phunt phenning munss, diezeit im lanndt ob der Enns gib und geb und der er gantz und gar ausgerichtt und beczalt worden ist zu rechtten tagen an allen schaden. Also haben wir im dem obgenanten Lienharten, Ottleins sun von Kappellen, seiner hausfrawn und irn baiden eriben die gemeltten halben hub mit allen irr zugehorung bestett und verlichen, was wir in rechtleichen daran bestetten und verleichen sulln oder mugen, doch das man uns und unserm gotshaus all jar jarleichen davon raichen und dienn sol nach innhaltung des eribbriefs, so uber die benanten hub gantz ist lautt und sag. Es ist auch der obgemeltt Mertt und all sein eriben der obenanten halben hub mit aller irr zugehorung des oberurten Lienharten, seiner hausfrawn Klarein und irr baider erben rechtt gwern und furstanndt fur all rechtleiche ansprach, wo und wann in des not und durfft beschiecht mit dem rechten, als dann soleichs kaufs und lanndes ob des Enns recht ist. Wir offen auch, das sy kainerlay wanndlung damit nicht haben sulln in kainerlay weis an unnser hanndt und gutem willn, und sulln uns auch alles das davon leiden und dulden, das annder unsers gotshauss erbler gein uns leident und duldent unverczigen unsers gotshauss rechten in allen sachen. Ze urkund geben wir in des also den offenn brief, besigeltem mit unserm anhanngundem insigel. Geben als man zalt nach Kristi geburd in dem vierczechenhunndertundachttundvierczigisten jaren an eritag vor Bartholomey.