Wir Thoman von Gottes genaden abbt zu Lambach bekennen mit dem brief, das fur uns komen ist Barbara, Hannsen des Aichaymer messrer ze Wels hausfraw, und hat mit wolbedachtem mut und gutem willn recht und redleichen verkaufft mit willen irs benanten mann ain virtail mit aller zugehorung an der nidern halben hub ze Weyspach, gelegen in Penewannger pharr, das ir recht endleichs und muterleichs erb und eribrecht von uns und unserm gotshaus ist, irm lieben swager und swestern Mertten dem Sneider, burger ze Lambach, seiner hausfrawn Kathrein und irn baiden erben umb ain sum geltz, der sy gantz und gar ausgerichtt und beczalt worden ist zu rechtten tagen an allen schaden. Also haben wir in den yetz benanten dem Mertten, seiner hausfrawn und irn baiden erben das berurt viertail mit aller zugehorung bestett und verlichen, was wir in rechtleichen daran bestetten und verleichen sulln oder mugen, doch das man uns und unserm gotshaus all jar jarleichen davon raichen und dienn sol nach innhaltung des rechtten eribbriefs, so uber gemeltten hueb gantz ist lawtt und sag. Es ist auch dew obgenant Barbara und all ir erben des obenanten viertail an der halben hueb mit aller zuegehorung des berurten Mertten Sneider, seiner hausfrawn Kathrein und irer baider eriben rechtt gwern und furstandt fur all rechtleichew ansprach, wo und wann in des not und durfft beschiecht mit dem rechten, als dann soleichs kauffs, erbrechtz und lanndes ob der Enns recht ist. Wir offen auch, das sy kainerlay wanndlung damit nicht haben sulln in kainerlay weis an unser hanndt und gutem willn, und sulln uns auch alles das davon leyden und dulden, daz annder unsers gotshauss erbler gein uns leident und duldent unverczigen unsers gotshauss rechten in alln sachen. Ze urkund geben wir in des also den offenn brief, besigeltem mit unserm anhanngunndem insigel. Geben als man zalt nach Kristi geburde in dem vierczechenhundertundsechssundvierczigisten jaren an sambstag nach sannd Erasem tag des heiligen bischolve und martrer.