Wir Thoman von Gottes genaden abbt zu Lambach bekennen mit dem brief, das fur uns komen ist Dorothea, Fridreichs von Mos seligen tachtter, und hat mit wolbedachtem muet und gutem willen recht und redleichen gemachtt und geben irm lieben mann Wolfganng, Lienharts ze Niderraw stewfsun und allen sein eriben sibenczechen phunt phenning zu verlorem gut nach dem lanndesrechten ob der Enns auf irr gerechtikait an ainem viertail, so sy hat an der Lueschen hub gelegen ze Hintterschuczing in Swannser pharr und eribrecht ist von uns und unserm gotshaus. Also haben wir im, dem benanten Wolfganng und allen sein erben das berurt gemachtt auf der gemeltten seiner hausfrawn gerechtikait, so sy dann hat an der benanten hueb, bestett und verlichen, was wir in rechtleichen daran bestetten und verleichen sulln oder mugen, doch daz man uns und unserm gotshaus all jar jarleichen davon raichen und dienn sol nach innhaltung, lautt und sag des briefs, so uber dy berurten hub gantz ist. Es ist auch die obgenant Dorothea und all ir eriben des benanten gemachts auf irr gerechtikait, so sy hat an der berurten hub des benanten irs mann Wolfganng und aller seiner erben rechtt gwern und furstanndt fur all rechtleichew ansprach, wo und wann in des not und durft beschiecht mit dem rechten, als dann soleichs gemachtz, verlorens guetz und lanndes ob der Enns recht ist. Wer auch nagster erib zu der gemeltten Dorothea gerechtikait nach irm abganng ist, der hat all jar jarleichen lasung zu unser lieben frawntag der liechtmess vierczechen tag vor oder in den nagsten vierczechen tagen darnach von des benanten Wolfganng nagsten eriben nach seinen abganng umb die oberurten sum geltz und nicht umb mer. Wir offen auch, das sy kainerlay wanndlung damit nicht haben sulln in kainerlay weis an unser hanndt und guetem willen, und sulln uns auch alles das davon leyden und dulden, das annder unsers gotshauss eribler gein uns leydent und duldent unverczigen unsers gotshauss rechtten in allen sachen. Ze urkund geben wir in des also den offenn brief, besigeltem mit unserm anhanngundem insigel. Geben als man zalt nach Kristi geburde in dem vierczechenhundertundfunffundvierczigisten jaren an mitichen an sannd Kathrein abent.