Bernardus miseracione divina tituli sanctorum quatuorcoronatorum presbyter cardinalis, Aquensis vulgariter nuncupatus, religioso viro abbati monasterii Lambacensi ordinis sancti Benedicti Pataviensis diocesis salutem in Domino. Ex parte Hartmanni Baronis baronie de Trawn dicte Pataviensis diocesis nobis oblata peticio continebat, quod cum olim gurris inter illustrissimos Austrie duces et comitem Goricie durantibus, ipse Hartmannus et quidam alius nobilis quarundam gencium armorum dictorum dominorum ducum capitanei deputati unacum gentibus ipsis domni comitis dominium sive comitatum intrassent et ulterius progrediendo prope quandam ecclesiam in dicti comitis dominio sitam pervenissent, exponente cum suis familiaribus extra ecclesiam et in campis remanentibus alter nobilis concapitaneus cum dictis gentibus ecclesiam prefatam vi et violencia intrarunt et quendam presbyterum ecclesie ministrum in altari celebrantem de altari necnon sacrarium apperientes sacramentum dominici corporis de montrancia sive reservaculo super altare proiecerunt ac demum nonnullis ecclesie bonis et rebus ad ecclesiam et cultum divinum pertinentibus ablatis ecclesiam ipsam temere incendio et ignis voragine destruxerunt. Et licet, sicut eadem veticio subiungebat, dictus exponens cum suis familiaribus continuis commessalibus premissis minime interfuerunt, nec ad ea perpetranda auxilium, consilium vel favorem prestiterint, tamen quiq piarum mencium est culpam timere ubi culpa minime reperitur, supplicari fecerunt humiliter dictus exponens necnon Cristofforus Smacz, Johannes Turk, Georgius Horner et Erhardus Marstaler armigeri ipsius exponentes familiares sibi pro conscienciarum suarum serenatione super hiis de oportuno remedio misericorditer provideri. Nos igitur auctoritate sacrosancte generalis synodi Basiliensis in spiritu sancto legitime congregate universalem ecclesiam representantis in absencia reverendissimi in Christo patres domni Ludovici eadem miseratione tituli sancte Crucis in Jerusalem presbyteri cardinalis, de hominibus vulgariter nuncupati maioris penitenciarii, per eandem sacrosanctam synodum deputati nobis super hoc specialiter commissa, discrecioni tue committimus, quatenus si est ita, dictos exponentes alias ut premittitur in premissis culpabiles fore non reperieris, super quo tuam conscienciam oneramus ipsos ab excessibus huiusmodi ac peccatis suis aliis, que tibi confitebuntur, nisi talia sint, propterque merito sit sedes apostolica consulenda, absolvas hac vice in forma ecclesie consueta et iniungas inde ipsis et eorum cuilibet de auctoritate predicta pro modo culpe penitenciam salutarem, quam secundem Deum anime sue saluti videris iniungendam. Si vero exponentes predictos in premissis seu aliquo premissorum consilio vel auxilio culpabiles repereris, postquam ecclesie et ministros quibus ob premissa ad satisfacionem aliquam teneantur iuxta tue discrecionis arbitrium satisfecerint competenter ipsos ab excomunicacionis sentencia, quam propter premissa incurrerunt, absolvas hac vice in forma ecclesie consueta et inungas inde ipsis et eorum cuilibet auctoritate predicta gravem penitenciam salutarem et alia que de iure fuerint iniungenda. Datum Basilee iiii nonas decembris anno a nativitate Domini millesimo quadringentesimo quadragesimo quinto.