Dem erwirdigen geistleichen herrn hern Thomann abbt zu Lambach embewt ich Margreth des Schuster tachtter ze Puchlewtten mein willig gehorsam dienst und tun ewern gnaden zu wissen, das ich allen mein erbtail, den ich ze Puchlewtten gehabt, kawfleichen verkaufft und ze kauffen gegeben hab meinem lieben vettern Chunraten dem Puller ze Puchlewtten und allen sein eriben umb ain sum gelts, der ich gantz ausgerichtt und beczalt worden bin zu rechtten tagen an allen schaden. Darauf bitt ich obgemeltte Margreth fur mich und all mein eriben dyemutikleich, ewr genad welle dem berurten Kunraten und allen sein eriben mein eribschaft und gerechtikait ze Puchlewtten furbas bestetten und verleichen und darumb brief und sigel geben. Wann ewr genad das getan hat, so glob und versprich ich mit mein trewn aydesweys wissentleichen in kraft des briefs, daz ich, mein erben noch nyemants nicht von unsern wegen ewern gnaden in ewr sigel nichtz reden noch sprechen sulln noch welln, auch ewerm gotshaws und nachkomen angever. Mit urkund des briefs, den ich also darub gib, besigelt mit des edeln Fridreich Perkchaymer zu Geboltskirchen aufgedrukchttem insigel, den ich obgemeltte Margreth mit vleyss darumb gebeten hab, im und allen sein erben an schaden, darunder ich mich verpind fur mich und all mein erben mit mein trewn an aydes stat alles daz war und stet zu halden und zu volfurn, das an dem brief geschriben stet. Geben als man zalt nach Kristi geburd in dem vierczechenhundert und vierundvierczigisten jaren an suntag vor sannd Peter und sannd Paulstag des heyligen zwelifpoten.