Wir Thoman von Gottes genaden abbt ze Lambach bekennen mit dem brief, daz fur uns komen sind Hanns Hyldner und Jacob sein bruder und habent uns furbracht ainen brief, ausganngen von unserm vorsedel abbt Jacoben saliger gedachtnuss damit underweyst, wie das gut ze Waydhausen gelegen zunagst Ulreichen dem Gartner mit aller zugehorung in Welser pharr ir rechtz vaterleichs erib und erbrecht von uns und unserm gotshaus ist. Hat der berurt Jacob das gemeltt gut gleich halbs verkaufft und ze kauffen gegeben seinem benanten bruder Hannsen zu seinem halftentayl, seiner hausfrawn Margrethen und irn baiden eriben umb ain sum geltz, der er gantz und gar ausgericht und beczalt worden ist zu rechttn tagn an alln schaden. Also haben wir im dem yetz benanten Hannsen, seiner hausfrawn und irn baiden eriben das obgemelltt gut gantz mit aller zugehorung zu rechttem kauf, erib und erbrecht bestett und verlichen, was wir in rechtleichen daran bestetten und verleichen sulln oder mugen, doch daz man uns und unserm gotshaus all jar jarleichen davon raichen und dienn sol zu unser lieben frawntag der dienstzeit zwaynczigk Wienner phenning. Es ist auch der gemeltt Jacob und all sein eriben des benanten gut halbs mit aller seiner zugehorung des berurten seins bruder Hannsen, seiner hausfrawn Margrethen und irer baider eriben rechtt gwern und furstanndt fur all rechtleichew ansprach, wo und wann in des not und durft beschiecht mit dem rechten, als dann soleichs kaufs, erbrechtz und lanndes ob der Enns recht ist. Wir offen auch, das sy kaynerlay wanndlung damit nicht haben sullen in kainerlay weys an unser hanndt und gutem willen, und sulln uns auch alles daz davon leyden und dulden, das annder unsers gotshauss eribler gein uns leydent und duldent unverczigen unsers gotshauss rechten in allen sachen. Ze urkund geben wir in des also den offenn brief, besigeltem mit unserm anhanngundem insigel. Geben als man zalt nach Kristi geburde in dem vierczechenhundertundvierundvierczigisten jaren an mantag nach sannd Jacobstag des heyligen zwelifpoten.