Wir Thoman von Gottes genaden abbt ze Lambach bekennen mit dem brief, das fur uns komen ist Lienhart Pesennger und hat mit wolbedachtem mut und gutem willen recht und redleichen verkaufft daz Obergut auf der Lakchen zu Phaffenperg, gelegen in Rusdorffer pharr und kawfleichen in sein gwaltsam bracht hat von Hannsen dem Pesennger seligem, auch erbrecht ist von uns und unserm gotshaues, des wir underweyst worden sein mit briefleicher urkund vormallen auch von uns ausganngen, und hat das ze kauffen gegeben seinem bruder Petern dem Sneyder ze Rewthaym, Smid Hainreichs seligen sun, seiner hausfrawn und allen sein erben umb ain sum gelts, der er gantz und gar ausgerichtt und beczalt ist worden zu rechtten tagen an allen schaden. Also haben wir im dem yetz benanten Petern, seiner hausfrawn und alln sein eriben das benant gut mit aller seiner zugehorung zu rechttem kauf und erbrecht bestett und verlichen, was wir in rechtleichen daran bestetten und verleichen sullen oder mugen, doch das man uns und unserm gotshaus all jar jarleichen davon raichen und dienn sol zu sannd Michelstag ain huen, und ze unser lieben frawntag der dienstzeit funff Wienner phening. Es ist auch der obgemellt Lienhart und all sein erben des benanten gut mit aller seiner zugehorung des berurten Petern, seiner hausfrawn und aller seiner eriben rechtt gwern und furstanndt fur all rechtleichew ansprach, wo und wann in des not und durft beschiecht mit dem rechten, als dann soleichs kaufs, erbrechtz und lanndes ob der Enns recht ist. Wir offen auch, das sy kainerlay wanndlung damit nicht haben sulln in kainerlay weys an unser hanndt und gutem willen, und sulln uns auch alles das davon leyden und dulden, das annder unsers gotshauss eribler gein uns leydent und duldent unverczigen unsers gotshauss rechten in allen sachen. Ze urkund geben wir in des also den offenn brief, besigeltem mit unserm anhanngundem insigel. Geben als man zalt nach Kristi geburd in dem vierczechenhundertundvierundvierczigisten jaren an suntag nach unser lieben frawntag der schiedung.