Dem erwirdigen geistleichen herren hern Thoman abt zu Lambach enpewt ich Dorothe Stephan des Gawbinger purger zu Wells hausfraw mein willig dinst zevor. Genediger herr, ich tun ewr erwirdigkait ze wissen, das ich all mein tail und gerechtigkait, so ich gehabt hab an der Furtwis, gelegen in Wellser pharr auf dem Wagrain, die von ewrn gnaden und gotzhaws ze lehen geet, Jorgen dem Sverczwadel purger zu Wells ze kauffen geben hab mit ganczer furczicht denselben meinen tail und gerechtigkait an der benanten wis, sent ich ewrn gnaden auf mit dem brief und pit mit allem vleiss, ewr gnad welle die egemelten mein gerechtigkait und mein tail dem benanten Sverczwadel leichen und den ze kauff bestetten und vertigen nach ewrs goczhaus gerechtigkaiten und gewonhaiten, das wil ich umb ewr gnad allczeit gern verdyenn. Mit urkund des briefs, besigelt mit des erbern und weysen Mertein des Praitwiser aufgedrukchten insigl, den ich mit vleiss gepeten hab, im und sein eriben an schaden, darunder ich obgenante Dorothe mich verpind mit mein trewn an aids stat alles das war ze haben, so oben geschriben ist. Geben den eritag in der ersten vastwochen anno etc. quadragentesimoquarto.