Dem erwirdigen geystleichen herrn herrn abtt Toman zw Lambach meinem genadigen lieben herren enpewt ich Anna Jacoben des Schefman purger zw Welss hawsfraw und Fridreichen des Mair zw Hundhaben saligen tochter mein willig gehorsam dinst. Ich tun ewern gnaden zw wissen, das mich mein lieber prueder Hans, Fridreich des Mair zw Hunthaben saligen sun, frewntlich und liebplich entricht hat von wegen des Prunlehen am Prun, gelegen in Pachmaner pharr das dan von ewrn gnaden und dem goczhaws zw Lambach zw lehen beruert. Pitt ich, ewer gnad well das dem benanten meinem lieben pruedern Hansen leihen, das wil ich willichlich umb ewr gnad verdien, wen ich mein eriben hinfur gegen ewern gnaden und dem gotczhaws chain inred nicht haben sullen noch wellen in kainerlay weis trewlich und ungeverlich. Und schikch auch ewern gnaden des zw urchund dew offenn pettzedl mit des erbern Petern des Swaben purger zw Welss awfgedrugkten insigel, den ich mit vleiss darumb gebeten hab, im und seinen eriben an schaden, under das insigel ich mich obgenantew Anna Scheffmanin und fur all mein eriben verpind mit meinen trewn in aydesweis alles das war und stat zw halden, so die petczedel innhalt und aufweist. Geben an montag vor sand Elspettentag anno Domini etc. quadragesimotercio.