Wir Thoman von Gottes genaden abbt zu Lambach bekennen mit dem brief, das uns an ainem besigeltem aufgabbrieve aufgesanndt hat Elsbeth, Hannsen des Preynhofer burger zu Wels hawsfraw, und bat uns vleissig, das wir dem benanten irm mann Hannsen, auch ir und irn baiden leiberiben geruchten zu bestetten und verleichen den newfanngk zu nidern Lochen, der zu dem hof zu Lochen gehort, und eribrecht ist von uns und unserm gotshaws, das ir geschaft, auch erbleich anerstorriben von Elsbethen des Czynischpanin worden ist, des wir alles underweyst sein mit briefleicher urkund. Also haben wir in, den benanten Hannsen dem Preynhofer, seiner hausfrawn Elsbethen und irn baiden leiberiben nach solicher aufgab, pet und underweysung den berurten newfanngk mit aller seiner zugehorung bestett und verlichen, was wir in rechtleichen daran bestetten und verleichen sullen oder mugen, doch das man uns und unserm gotshaws all jar jarleich davon raichen und dienen sol zu unser lieben frawntag der dienstzeit funff Wienner phening. Wir offen auch, das sy kainerlay wanndlung damit nicht haben sullen in kainerlay weis an unser hanndt und gutem willen, und sullen uns auch alles das davon leyden und dulden, das annder unsers gotshauss eribler gein uns leydent und duldent unverczigen unsers gotshauss rechten in allen sachen. Ze urkund geben wir in des also den offenn brief, besigeltem mit unserm anhanngundem [insigel]. Geben als man zalt nach Kristi geburd in dem vierczechenhundertunddreynundvierczigisten jaren an suntag Mauricii.