Dem erwirdigen geistleichen herrn hern abt Toman zw Lambach meinem genadigen lieben herrn enpewt ich Elspet Hansen des Preynhofer purger zw Welss hausfrau mein willig gehorsam dinst. Ich tue ewren gnaden zw wissen, das mir mein muem saligew Elspet, Hansen des Czyenespon saligen witib, geschaft hat und mich eribleich von ir anerstorben ist der Newfang zw Nidern Lochen, der zw dem hof zw Lochen gehort und von ewren gnaden und dem gotczhaws zw Lambach ze lehen beruert und ist eriblehen. Pitt ich ewr gnad diemutichlich mit allem vleiss, ewer gnad well denselben Newfang mit seiner zugehorung meinem lieben mann Hansen dem Preynhofer und auch mir und unser paider leiberiben leihen, das wil ich alczeit willichlich umb ewr gnad verdien, und schikch ewren gnaden auch des zw urchund den offen brief, besigelt mit der erbern und weisen Hansen des Goldner und Hansen des Hobschen paider aufgedrugkten insigln, dew ich obgenantew Elspet Hansen des Preynhofer hausfraw mit vleiss darumb gepeten hab, in und iren eriben an schaden. Geben do man zalt nach Christy gepurd vierczehenhundert und in dem drewundvierczigisten jar an mitichen vor sand Mathewstag.