Ich Wolfgang, Hannsen des Vischer weillent burger zw Swans saligen sun, embeutt dem erwirdigen geistleichen herrn hern Thoman abt zw Lambach mein willig gehorsam dienst. Ich tue ewrn genaden ze wissen, das ich meim gleichen eribtail, so ich gehabt hab an dem oberen gutt zu Staig, gelegen in Swanser pharr, mit anderen meinn miteryben verchauft hab Wolffgangen daselbs zw Staig gesessen. Nu sendt ich ewren genadn meins gleichen erybtails lehen auff in chraft des briffs und bitt ewr gnad, das ir dem obgenantten Wolfgang meinn gleichen erytail mitsambt anderr meiner miteribtail leicht und stet tuet mit bryff und sideln, das ist mein gutleicher will und vleissigs gepedt, und gelob ewren gnaden mit meinn trewn in aidesweys, das ich darinn nicht reden noch sprechen will in chainer weis angever. Und gib ewrn gnaden des ze urchund den offen pedtbriff under der erberen weisen Steffans des Smidcz ainer des racz zu Swans und Gilgen des Grabmer burger daselbs baider aufgedrukchten pedtschaften, die ich vleyzz darumb gepedten hab, inn baiden und iren eryben an schaden. Geben an erychtag vor kathedra Petry anno Domini etc. xliii.