Wir Thoman von Gottes genaden abbt ze Lambach bekennen mit dem brief aller manikleichen den er furkumbt zu horn oder zu lesen, das fur uns komen sind Margreth die Perinn ze Oberczeidlorn, Hannsen des Nussleins seligen tachtter, mitsambt ir ir sun Peter und Hennsel, auch ir tochtter Elsbeth, Lienhart des Maurer hausfraw, auch Anna, Symon des Gutmanndleins hausfraw, die habent uns furbracht, wie sew sich liebpleich und frewntleich verricht und geaint haben mit irn aidem, swager, tachtter und swester, Bernharten dem Pinter, seiner hausfrawn Wanndalda umb ain viertail in der pewnten an der Perlewten ob des hawss und hofstat und umb ain achttail in der pewnten genant in der Schusstat ob des benanten Maurer, darauf sew ain haus setzen wellent, gelegen hie alles in unserm purkchfrid ze Lambach, yedes mit aller seiner zugehorung, also wie der benant Bernhart den merern tail in sein und seiner eriben gwaltsam bracht hab, dann sein hawsfraw hab in eribschaft daran fur zwainczigk schilling phening. Baten uns die obgemeltten Margreth, ir sun Peter, Hennsel, auch ir tochtter mit wissen und willen irer benanten mannen, das wir dem benanten Bernharten und allen sein eriben das benant virtail und achttail mit aller zugehorung in den gemeltten pewnten und der gemeltten seiner hawsfrawn Wanndala und allen iren erben zwainczigk schilling phenning darauf fur ir eribschaft geruchten zu bestetten und verleichen zu kauf, eribschaft und rechttem purkchrecht. Also haben wir in das bestett und verlichen, was wir in rechtleichen daran bestetten und verleichen sulln oder mugen, dach das man uns und unserm gotshaws all jar jarleichen davon raichen und dienn sol zu purkchrecht nach innhaltung unsers gotshaus urbarpuch. Sich verczeichent auch die obgemeltten Margreth die Perin und irew benantew kinder fur sich und all ir eriben des obenanten virtail und achttails mit allen irn zugehorungen aller irer erbschaft und gerechtikait daran ganntz und gar wissentleichen mit kraft des briefs, das sew noch all ir eriben gein dem gemeltten Bernharten, seiner hausfrawn Wanndala und irn baiden eriben furbas darumb kainen zuspruch noch ansprach darauf noch darnach nymermer haben, gwingen, suchen sulln noch enwellent mit recht noch an recht, geistleich noch weltleich und in kainerlay anndern weys und sachen getrewleichen und ungeverleichen. Und ob sew aber oder annder iemant icht von irn wegen ichts gein in darumb anhuben, wie sich das begeb, des der obgemeltt Pinter, sein benantew hawsfraw oder irer baider eriben yeder tail an seinem tail schaden namen, den sulln und wellent sew in abtragen und mugen auch das alles haben und bekomen zu in allen irn eriben und trewn und darzue auf aller irer hab und gut ungeverleich. Wir melden auch, das sy kainerlay wanndlung damit nicht haben sulln in kainerlay weys an unser hanndt und gutem willen, und sulln uns auch alles das davon leyden und dulden, daz annder unsers gotshawss lewt gein uns leydent und duldent, die dann gesessen sein hie in unserm markcht und purkchfrid unverczigen unsers gotshauss rechten in allen sachen. Ze urkund geben wir in des also den offenn brief, besigeltem mit unserm anhanngundem insigel. Geben als man zalt nach Kristi gepurde in dem vierczechenhundertundzwaynundvierczigisten jaren an freytag vor Mathie apostoli.