Johannes miseracione divina tituli sancti Martini in montibus sacrosancte Romane ecclesie presbyter, cardinalis de Bavaria vulgariter nuncupatus sacrosancte generalis sinodi Basiliensis in spiritu sancto legitime congregate, universalem ecclesiam representantis, ac apostolice sedis per Germanie partes de latere legatus, religioso viro Thome abbati monasterii Lambacensis ordinis sancti Benedicti, Pataviensis diocesis, salutem in Domino sempiternam. Commissum nobis legacionis officium digne peragere satagentes promptum et benivolum libenter illis favorem impendimus, in quorum habetur desideriis, ut sub vita regulari in puritate consciencie Domino famulantes mereantur gloriam perpetue claritatis. Hinc est, quod nos devotis tuis supplicacionibus inclinati auctoritate legacionis nostre, qua fungimur in hac parte, tibi presencium tenore indulgemus, ut aliquem ydoneum et discretum presbyterum in tuum possis eligere confessorem, qui tua confessione diligenter audita, pro commissis peccatis et delictis eciam, si ex labe symonie aut alias talia sint, propter que merito esset sedes apostolica consulenda, et a quibuscumque excommunicacionis, suspensionis et interdicti sentenciis per constituciones provinciales et sinodales diffiniciones et statuta monasterii et ordinis predictorum seu alias a iure vel ab homine generaliter promulgatis penis et censuris aliis, quibus legatum te forsan credis, tibi debitam absolucionem impendat et penitenciam iniungat salutarem. Insuper prefato confessori tuo, quem duxeris eligendum auctoritate predicta committimus, ut si quam irregularitatis maculam premissis sentenciis vel penis seu aliqua premissarum sic ligatus aut alias coram excommunicatis, suspensis ac locis interdictis scienter vel ignoranter, non tamen in contemptu clavium divinis te immiscendo officiis contraxisti vel incurristi, te prius ad tempus, de quo ipsi confessori videbitur, a tuorum ordinum execucione suspenso suffragantibus meritis alioque canonico non obstante, super irregularitate premissorum occasione contracta, idem confessor tecum auctoritate predicta misericorditer dispenset, rehabilitet et in pristinum statum, in quo ante peccata, ut premittitur, forte commissa eras, reponat et restituat, ceterum discrecioni tue presencium tenore committimus, quatinus auditis per te vel alium presbyterum ydoneum, quem ad hoc deputaveris, singulorum dicti tui monasterii monachorum, noviciorum et conversorum, actu professorum et huic ad quinquennium profitendorum confessionibus ipsos a sentenciis, penis et censuris predictis, si quas incurrerint, tu vel idem confessor sic deputandus absolvas vel absolvat et super irregularitate et inhabilitate, si quas ipsi monachi aliqua dictarum sentenciarum ligati contraxerint, in omnibus et per omnia iuxta modum et formam prescriptos dispenses seu dispenset misericorditer cum eisdem, ita tamen, quod tu vel aliquis prefatorum dicti tui monasterii monachorum, noviciorum, conversorum, si quibus ob premissa ad satisfactionem aliquam teneamini, satisfacias vel satisfaciant competenter, alioquin presens nostra concessio quo ad premissa vobis nullatenus suffragetur presentibus ad quinquennium in suo robore duraturis. Datum Nuremberge, Bambergensis diocesis, xvi kalendas februarii anno a nativitate Domini millesimoquadringentesimo quadragesimoprimo.