Wir Albrecht von Gotes gnaden herczog ze Osterreich, ze Steir, ze Kernden und ze Krain, markgraf ze Merhern und grave zu Tirol etc. embieten unserm lieben gettrewn Reinprechten von Walsse, unserm hauptman ob der Enns, unser gnad und alles gut. Wan wir des goczhawss zu Lambach und aller seiner leut und guter herr und vogt sein nach der brief awzweisung, die dasselb goczhaws darumb hat, vernemen wir, wie desselben goczhawss lewt von ettleichen phlegern, ambtlewten und meniger andern umbsessen oft angevallen und in meniger weis unbilleich beswert werden wider recht und auch wider die gnad und freyhait, die in von weillent unsern vorvordern lobleicher gedechtnuss gegeben sind, und die wir yecz von newn dingen mit unserm sundern brief vernewet und bestett haben, das uns nicht gevellt. Emphelhen wir dir ernstleich und wellen, daz du des n. dem abbt, demselben seim goczhaws und allen irn lewten und gutern vorseyest und si auch an unser stat bey solichen irn gnaden, freyhaiten und rechten nach der obgemelten irer brief innhaltung vesticleich vogtest, haltest und schirmest vor allem gewalt und unrecht und nicht gestattest, daz si yemant dawider anvall und beswere in dhain weis, doch uncz an unser widerruffen, daran begeest du genczleich unser maynung. Geben zu Wienn an phincztag nach dem heiligen phingstag anno etc. tricesimoprimo.