Wir Johanns von Gotes genaden abbt zu Lambach und der gantz convent daselbs bekennen, das fur uns komen ist Kathrey, weylent Hainreich des Paumhakcher saligen hausfraw, und hat uns erweist mit urkund, die sy hat von unserm vorsedel abbt Ulreichen saligen gedachtnuss gehabt umb das gut ze Aychaym mit seiner zugehorung gelegen in unser pharr zu Lambach, und ist eribrecht von uns und unserm goczhaus, das sey an erstarben ist von dem eegemelten irm wirt saling. Dasselb gut hat die vorgemelt Kathrey halbs verchaufft Fridreichen dem Wikchpaurn, und das halb gut ze Aichaim haben wir ir und irn eriben bestettet und verlihen zu rechtem eribrecht mit allen den eren, rechten und nuczen, die von allter und durch recht darczu gehornt oder davon bekomen mugen, nichts ausgenomen ungeverleich in der beschayden, das sy uns und unserm goczhaus alle jar jarleich davon diennen und raichen sullen an unser frauen tag zu der diennst zeit funf und zwainkchczig Wienner phennig, an dem brehentag funfczehen Wyenner phening ze paustaur und anderhalb huen, an sannd Gorigen tag vier Wyenner phening ze vogtsteur. Wir offen auch, sy schullen kain wanndlung da mit nicht haben in chainerlay weys an unser hanndt und guten willen, und sy sullen auch alles das davon leyden und dulden, das ander unsers goczhaus eribler gegen uns leyden und dulden unverczigen unsers goczhaus rechten in allen sachen. Des zu urkund geben wir in den brieff, besigelten mit unser bayder anhangunden insigel, der geben ist nach Christi gepurde vierzehenhundert jar und darnach im ains und dreissigisten jar des freytags nach sannd Ulreichs tag.