Wir Hanns von Gots gnadn abbt ze Lambach und der gantz convent desselben kloster bekennen mit dem offen brief, das wir mit veraintem rat verlihen haben Ortolffen dem Vischer ze Obern Hardarn, Annan seiner hawsfrawn, und allen irn paiden erbn ze rechtem eribrecht unser hub ze Obernhardarn im dorff, und ain wisen ze Praitenschutzing auf der Praitwisen zwischen des pharrer und Micheln von Aping wisen, gelegen in Swanser pharr. Wir haben in auch die benanten hub und visen eingeantwrt mit allen den ern, rechten [...] davon bekomen mugen, nichts ausgenomen ungeverleich in der beschaiden, das [...] aws jarleich und all jar von der hub diennen und raichen sullen [...] funf schilling allter Wienner phenning an dem prehentag [...] ze sand Michelstag zehen phenning, ze wein [...] ewr, ze unser frawntag sechs huner, und von [...]ennig, ze sand Jorgen tag. Wir offen, sew sullen dhain wannd[...]lay weis an unser hanndt und guten willen, und sullen auch alles [...] dulden gein uns und unerm gotzhaws, das annder unsers gotzhaws erbler gein [uns leide]nt und duldent unvertzigen unsers gotzhaws rechten in allen sachen. Des ze urchund geben wir in den brif, versigelt mit unsern paiden anhangunden insigeln. Geben an unser frawn tag ze der liechtmess nach Christi geburd viertzehen hunndert jar, darnach in dem vier und zwaintzigisten jar.