Ich Hanns Ledrer ambtman ze Dratenekk vergich offenleich mit dem brif, das ich enphangen und angenomen han von wegen meins gnadigen herren Reinprechten von Wallssee, hawbtman ob der Enns von vogtay wegen von dem erwirdigen geistleichen herren hern Hannsen, abbt und dem convent ze Lambach dreizzig phunndt Wienner phennig von dem viertzehen hunndertisten und drewundzwaintzigisten jar, derselben dreizzig phunndt phennig. Sag ich den egenanten abbt und sein gotzhaws fur den obgenanten meinen gnadigen herren von Wallssee quidt, ledig und los. Mit urchund ditz brifs, versigelt mit meinem aufgedrukchten petschaft, wann ich aygens insigels nicht enhan. Geben an sand Philipps und sand Jacobstag anno Domini etc. vicesimo tercio.