Wir Hanns von Gots gnadn abbt ze Lambach bekennen mit dem offen brief allen den er furkumbt, das fur uns komen sind Chunrat Protzchs, Anna sein hawsfraw und Steffan Fleischakcher ze Thesselprunn, Anna sein hawsfraw, und habent uns ermont umb das Aygen, genant das Protzchsenaygen, gelegen ze Pheffenperig in Rusdorffer pharr, das auch weillent unserm gotzhaws vermannt was und unser vorsedel abbt Simon saliger gedachtnuzz mit recht erlangt und eingetzogen hat. Nu haben wir den benanten lewten und irn erbn das egenant aygen mit seiner zugehorung ze rechtem eribrecht verlihen mit allen den ern, rechten und nutzen, die von allter und durich recht darzu gehorent und davon bekomen mugen, nichts ausgenomen in der beschaiden, das sew uns und unserm gotzhaws jarleich davon diennen und reichen suellen an sand Michelstag funftzehen Wienner phennig, und sullen auch dhain wanndlung damit haben in dhainerlay weis an unser hanndt und guten willen, und sullen auch alles das davon leiden und dulden gein uns und unserm gotzhaws, das annder unsers gotzhaws erbler gein uns leident und duldent unvertzigen unsers gotzhaws rechten in allen sachen. Des ze urchund geben wir in den brief, versigelt mit unserm anhangunden insigel, geben an suntag vor sand Steffans tag im snit nach Christi geburd viertzehenhunndert jar, darnach in dem drew und zwaintzigisten jar.

Source Fulltext: StiAL, Kopialbücher, HS 17, P. Augustin Rabensteiner OSB: Documenta monasterii Lambacensis Bd. II, ab anno 1416-1443, S. 148f, Nr. 702