Dem erwirding meinem genädigen herrn abt Symon ze Lambach embiet ich Peter Pucher mein willig dienst. Ich hab ain guet genant dacz Öd gelegen in Penebanger pharr, ist lehen von ewch vnd dem goczhaws, das hab ich gesaczt Kassparn dem Hawnolten, also er des mein brieff hat vnd gib ewch das auf mit dem brieff vnd pitt ew, ir leicht es dem Kassparn. Versigelt mit Chunracz des Awoldinger aufgedrukchtem insigel, im vnd sein erben an schaden, wenn ich aygens jnsigels nicht enhab. Geben an Montag vor Mittervasten anno etc. LXXXXVIIto.