Wir Jans von Gotes gnaden apt ze Lambach und der convent da selben verichen und tun chunt allen den den disen prief sehent oder lesen harend, daz der ersam man Helmhart der Tutzzenperiger im und seiner hawsvrown vroun Margretn zu einem selgret gechauft hat setzzig neur pfenning geltes da^tz Smiding pei Grieschirichen aus des custray ze Lambach in di oblay da selben also weschaidenleich, daz man schol all jar ze der lyecht mezze in den selben acht tagen der vorgenanten vrown vrow Margreten der Tutzzenpergerinn ieren jar tag wegen ewichleich mit mezz und mit vigily und mit allen guetem ding. Daz daz stet und unzenwrochn weleib, dar um geb wir disen prief versigeltn mit unserm insigel und mit unserms convents insigel. Der prief ist gegeben nach Christes gepuert dreuchehen hundert jar dar nach in dem vier und dreitzzistem jar an unser vrown tag ze der liecht mezz.

Source Fulltext: StiAL, Kopialbücher, HS 16, P. Augustin Rabensteiner OSB: Documenta monasterii Lambacensis Bd. I, ab anno 992-1415, S. 230, Nr. 209