Ferdinand...Erzherzog von Österreich usw. verwandelt vnnser Sloss Egenberg, Welhes wir hieuor vnnserm getrewen Johann Ferenberger vnnserm Secretari mit all seiner Zuegehorung, daz da ist Innhalt weylennd Kayser Maximilians Phanndtbrief, so sein Maiestat hieuor Bernharten Kirchperger vmb beruert Sloss gefertigt vnnd widerumben aus seinen Hannden gelösst hat, Benenntlich der Ambt vnnd Pawhoff daselbs vnnd die Tafern auf der Rewt die Müll vnnd Zwo Selden Zu vorchdorff die der Vischbekh Innenhat, vnnd die Vischwaid auf der Alben, vnnd die Vischwaidt auf der klainen vnnd grossen lauta alles in vorchdorffer gelegen, die Höltzer Wismad Waid Wasser dartzue daz Kirchlehen im Sloß auch die Vogtey vnnd Robat sein Lebennlanng Phlegsweise Innenzehaben verschrieben, yetzo als vnnser aigenthumb in die Natur aines rechten erblichen Mannlehens, verleiht solhs Sloß allain gedachtem Fernberger vmb der getrewen dienst willen, so Er gedachtem Kayser Maximilian, vnnserm Brueder vnnd vnns aufrichtigklichen vngespart ainiches Vleis gethan hat, gestattet, daz Er vnnd sein Eelich leibserben sich von gedachtem Sloß Egenberg haissen nennen vnnd schreiben mugen, doch behalten wir vnns die obgemelten grundt vnnd gueter so yetzo Zu gedachtem Sloß gehörn, beuor, Also Wann wir oder vnnser Erben nach gedachts Ferenbergers abganng von seinen Erben dar vnnser Ambt Mollen vmb den Phanndtschilling, den sie darauf haban, in vnnser Camer ledigen, das dann dieselben gründt vnnd gueter gedachtem Ambt Mollen zuesteen, Wie sich dann derselb Ferenberger des für sich vnnd seine Erben in sonnderheit gegen vnns verschriben hat. 

Original dating clause: den 19. May

Language: deutsch