Ich Sigmund Hayden zu Dorf Bekenn für mich all mein erben mit dem offen brief, das Ich mit guetem willen wolbedächtlich Recht vnd redlich verkaufft vnd zukauffen geben hab dem Erwirdigen In got vnd geistlichen Herrn herrn Johannsen Abbt zu Krembsmunster seinem Conuent gotshaws vnd nachkömen daselb mein guet am lehenn gelegen vnd mein freys aigen ist, darauf Peter Lehner sitzt, vnd dient man Järlich von dem lehenn zu vnnser Lieben frawen tag der dienstzeit Sybenn Schilling zwenvndzwaintzig pfennig vier käs viertzigk ayr, von dem güetlein am michleinsperg dient man zwenvnddreissig pfennig. Ich hab In also die gemelten güetl Irer zugehörung für freys aigen aus mein meiner erben gewaltsam nutz vnd gewer In Ir Ires gotshaws vnd nachkömen nutz vnd gewer zestätem kauf vnd vnnser Ewiger verzicht aingeantwort, Also das Sy Nun vnd fürbas damit allen irn nutz vnd frumben söllen vnd mügen betrachten, Innhaben nützen vnd geniessen verkauffen vnd geben Wem Sy wöllen an mein meiner erben vnd menigkhlichs von iren wegen widersprechen vnd Irrung. Ich obgenenter Sigmund Hayden setz mich also des genenten prelaten seins Convents vnd gotshaws Recht gewer vnd fürstanndt für all ansprach, Wo wann vnd alsoft In des zuerecht not vnd durft beschiecht, alsdann sölhs Kaufs gewerschaft der freyen güeter vnd lanndes Ob der Enns Recht ist. Gienng In aber daran Icht ab, Wie Sy des schaden nämen kainen ausgenomenm, dieselben schäden alle zusamben dem haubtguet söllen vnd mügen Sy haben vnd bekömen zu mir meinn erben, darzu auf allen vnnsern anligunden vnd varunden güetern, Wo wir die haben oder gelegen sein, Inner oder ausser Lanndes Nynndert noch nichts ausgenomen, vntzt Sy haubtguets vnd aller schäden auf Ir ganntz vnd volkömens benügen entricht vnd gewert sein, Alles getreulich vnd angeuerde. Zu Vrkund des briefs Besigllt mit meines obenenten Sigmunden Hayden aigen anhangundn Insigll vnd zu merer Sicherhait hab ich mit vleis Erbettn die Edln fessten Hannsen Hayden zu dorf meinen Lieben Brueder vnd Vlrichen Seebacher zu Krembsegk, das Sy von gezeügnüs wegen auch Ire aigen Insigll an den brief gehanngen haben In Irn erben an schaden, vnder die Insigll ich mich oftgenenter Sigmund Hayden vnd für mein erben verbinde, Ausweisung des briefs war vnd stät zu hallten. Der geben ist an Eritag nach sand Thamans des heiligen zwelfpoten tag Nach Cristi vnnsers Lieben Herrn geburd Fünffzehennhundert vnnd Im Segstenn Jahr.