Ich Jo^erig der Tewrbanger swester sun purger ze Stetyr vnd mein hausfraw vnd mit sampt vns alle vnser erben, wie die genant sind, vergehen, vnd tu^en chunt mit dem offen prief vor allen Lewten gegenwu^ertigen vnd chunftigen, Daz wir mit wolbedachtem mu^et, mit gunst vnd willen vnser erben, zder zeit vnd wir daz mit recht wolgetu^en machten vnd ez niemant widersprechen macht noch widersprach, recht vnd redleich ze chauffen geben haben, ain hu^eb die Chohhu^eb genant gelegen in Syrdnikcher pharre, daz vnser erbrecht gewesen ist von dem Erwirdigen Gotshaws ze Chremsmunster, da von wir aller iar ierleich gegeben haben ze dienst, ain halb phunt phenning an sand Merten tag gen Chremsmünster vnserm lieben, genedigen Herren Abjpt Merten zden zeiten ze Chremsmünster vnd seinem Conuentt vnd haben in auch dieselben Hu^eb gegeben, aws vnser nucze vnd gewer in ir nucze vnd gewer mit allen den eren rechten vnd nuczen die dar zu^e geho^erent vnd da von becho^emen mugen ze Holcze, ze velde, wie daz alles genant ist, versücht vnd vnuersu^echt, vmb ain gelt dez si vns gancz vnd gar gericht vnd gewert habent, Also daz wir noch alle vnser erben hincz derselben Hu^eb nimmer mer dhain zu^espruch noch ansprach haben noch gewinnen sullen weder mit recht noch an recht vnd tu^en vns auch der aller sache genczleich vnd gar mit dem prief ze fu^erzicht. Wir wellen vnd sullen, auch derselben vorgenanten Hu^eb ir gewer vnd fu^erstant sein nach dem lants recht ob der Enns. Na^emen si dar vber von der gewerschaft wegen mit recht indert dhainen schaden, wie der selbig schad genant wurde, den si mein Herre von Chremsmunster vnd sein Conuentt oder ir nach cho^emen ir ainer pei seinen trewn an aide vnd vnberechtet gesprechen mag, denselben schaden sullen wir in aller sache genczleich vnd gar ausrichten ablegen vnd wider cheren an alle wider rede, vnd sullen auch das haben dacz vns vnd vnsern trewn vnd dar zu^e dacz aller vnser hab, vnd wir haben, versu^echt vnd vnuersu^echt vnd desselben schadens da von bechomen, an chlag fürbot, vnd recht, so si nachst mugen mit vns vnd vnser erben gu^etleichen willen vnd wort wir sein lembtig oder tod, Daz die rede fürbaz sta^et vnd vnuerchert beleib, darvber gib Jch obgenanter Jo^erig meinem Herren von Chremsmu^enster vnd seinem Conuentt, den prief fu^er mich, vnd mein erben zu^e einem waren vrchu^ende der Warhait versigelten mit meinem anhangunden Jnsigel vnd zu^e einer gu^eten, geczewgnu^esse mit dez erbern vesten Ritter hern Walthers von Sewsenekk zden zeiten purgraf ze Steyr anhangunden Jnsigel im vnd seinen erben an schaden, Geben nach Christi gepu^erde Drewczehen Hundert iar dar nach in dem Achczigisten iar. an dem freytag vor sand Jo^ergen tag.

Source Fulltext: OÖUB 9 (Wien 1906) S. 835-836