Wir Mertein von gotz gnaden Apt zü chremsmunster veriehen vnd tun chunt allen den lowten. die den prief an sehent, lesent, oder horent lesen, daz wir mit wolpedachtem müt, vnd nach rat vnd gunst vnsers conuencz ze chauffen haben geben vnsern Hof ze Aptay gelegen in chirchperger pharr mit allen den eren, rechten, vnd nuczen vnd dar zu^e gehort, ze holtz, ze ueld, ze wismad, wie daz gnant ist, stephlein von O^edenperg seiner hausfrawn vnd ir payder erben vmb ein gelt dez wir gancz vnd gar gericht vnd gewert sein, vnd auch der egnant Hof lehen ist auz vnserm siechhaus. auch sol der egnant stephel oder wer den Hof inn hat, all iar iarleich da von dienen vnd raihen in daz siechhaus an vnser Vrawn tag zder dinst zeit ein halb phunt wienner phenning vnd sechczk zü sand Merten tag, zü stewer vnd nicht mer. Er sol auch daz selbig gelt raihen an alz vertziehen, vnd abgang vnd wann er den egnanten dinst nicht raihet auf di^e egenanten ta^eg, so sol er oder wer den hof inn hat ye vber virczehen tag sechczk phenning ze wandel veruallen sein dem siechmaister. Er sol auch noch sein nach chommen den offtgenanten hof nyemant zü uerchauffen geben dann i^ern gleichen vnd dem wir gern leihen, wann sich der hof verwandelt iz sey mit verchauffen oder mit dem tod, wie daz geschach so sol er taydigen mit dem siechmaister vmb di^e anlait nach gewonhait vnd recht vnd vnsers gotzhauzz grunt vnd der siechhauzz recht habent, wir sein auch dez egenanten hofs ir vorstant vnd gwer wo in dez not geschiecht nach landez recht ob der Ens, der sach ze vrchunt vorgenanter, geben wir egenanter apt Mertein dem offt genanten stephan seiner hausfrawn vnd ir payder erben den offen prief versigelt mit vnserm vnd vnsers conuentz payder anhangunden Jnsidel. Geben nach christi gepurd drewczehen hundert iar, dar nach in dem acht vnd Sibenczkisten iar, dez nachsten vreytags nach dem Prehentag.

Source Fulltext: OÖUB 9 (Wien 1906) S. 373-374