Ich Albrecht von Neunburch und ich Pendit sein hausvrawe veriehen an disem brief und tuen chunt allen den, di disen brief lesent oder horent lesen, die nu lehent und her nach chumftich werdent, Daz wir mit zeitigem rat vnser pesten freunt ze der zeit, do wir iz wol getun mochten, mit gunst und mit willen aller unser eriben, Daz wir durch unser sel hail willen geschaft haben Ebichleichen Den erbern herren ze chremsmunster mit sant der Sampnunge des selben goteshaus noch mein Albrecht Tod von Neunburch chlosterhalbe ain halbes Jeuch weinbachst leit an der Eren znest dem Planstaw^eder und dient alle iar ze rechtem Perchrecht andert halben Emmer weins und drey pfenning ze voidrecht und nicht mer, also beschaidenleichen, daz mein herren datz chremsmunster mit sant der sampnung alle tag ain Ebigev messe haben schuln von dem selbem weingarten durch unser sel hail willen und schullen nu den hefen pey unsern lepentigen zeiten wer aver daz mein herren datz Chremsmunster mit sant der samptnunge alle tag der Ebigen messe nicht ensprechen oder nicht wolden haben und swo des mein herren ze chremsmunster mit sant der sampnunge des uber wert bu^erden So schuln sich mein Nechstev Freunt Des selben weingarten under winden und schuln in geben in ain ander chloster durch unser sel hail willen, wo wir hin wellen. Und ist daz geshehen mit unsers Perigmaister hant Seidleins des Tutzen ze der zeit, do wir iz wol getuen mochten. Also daz mein herren datz chremsmunster mit dem vorgenanten weingarten furbaz ledichleichen und freyleichen do mit alle irn Frum schaffen schuln an allen irrasal. Und daz auch disev red sted und unzeprochen beleib, Des geben wir mein herren ze chremsmunster mit sant der Sampnunge des selben gotes haus disen brief zu ainnem waren gezeug versigelt mit unsers Perigmaisters Insigel Seidleins des Tutzen, der diser sach gezeug ist mit seinnem Insigel. Des sint gezeug der erber Ritter her Cliristan der Sluzzler und der erber Ritter her Simon der alt richter, Her Dietrich der schiver, Her Gebhart der alt Richter, her Chunrad der smuchenpfenning und her Peter von sande Mertein ze den Zeiten Juden Richter und her Chunrad der schiver, her Wernhart under den lauben und Leupolt von awe und dietrich der Retzer und artolf der hofmaister und Jans in dem Chies uud ulreich der schreiber und ander frum laut genu^ech, den disev sach wol chunt ist. Der brief ist noch Christes purt waren ergangen Dreutzehen Hundert Jar indem Dreu und dreyzigisten Jar an sande katrein tag.

Source Fulltext: OÖUB 6 (Wien 1872) S. 108f., Nr. 99