Ich Peter der Ponhalm genant vnd Margreth mein liebe Hawsfraw vergehn vnd tun kund allen den, (die) disen Brief lesent oder hernt lesen, di nun sind oder kunfftig sind, das ich sechs Gut, di in Kempnater Pharr ligent, ze kauffn gegeben han von erhaffter Not dem Ersamen Herrn Abt Fridreichn vnd den geistlichn Herrn aller der Samung ze Krembsmunster vmb Hundert Phunt Pheningen vnd vergehn auch, das wir vnd all vnser (erben) vnns vertzign habn alles des Rechts, das wir an denselbn Gu^ettern von rechter Lehenschafft oder von, Erb rechten her haben gehabt vnd derselbn Gut sind datz Pircho^ed ains, datz Grueb ains, datz Prun drew, dew fu^enfen Rechtlehn warn vnd das vierd auch datz Prun, das Erb was. Vnd das dy vorgenantn Herrn der Abt vnd dew Samung vngemu^et belibn ewigklichen von vns vnd von vnnsern Erbn, besta^etig Wir In disen Kauf vnd disew Furzicht an denselbn Gu^ettern mit Herrn Eberhartz von Walse des Landrichter ze den Zeittn Insigel vnd mit dem Meinem vnd mit der erbern Lewt Nam, dy pey der Wandlung sind gewesn vnd der Sach Zeu sind, das ist ze dem erstn Her Wernhard der Prior vnd Her Hainreich der Kelner datz demselbn Gotshaus, di ditz Gewerfs Redna^er waren, vnd Her Vlrich der Rot vnd sein Sun Fridreich vnd Ott, Her Hainrich von Achleuttn vnd sein Sun Hainrich, Wernhard vnd Berichtold, Vlrich vnd Ott von Sultzbach, Chunrat von Lautbach, Berichtold von Otzdorff vnd ander manig Man Pider Leut. Der Kauf vnd der Gewerf ist geschehn, da von Kristes Purd warn ergangn dreuzehen Hundert Jar vnd achtzehen Jar an sand Thomas Tag.

Source Fulltext: OÖUB 5 (Wien 1868) S. 235-236, Nr. 240