Nos Fridericus, dei gracia Dux Austrie et Styrie, Dominus Carniole, Marchie ac Portus navonis, ad Universorum presentes intuencium noticiam cupimus pervenire, Quod constitutus in uostra presencia Vir honorabilis et Religiosus Fridericus, Abbas monasterii Chremsmunsterensis, Ordinis Sancti Benedicti, Pataviensis Diocesis pro se et conventu suo nobis humiliter supplicavit, ut quoddam privilegium dive recordacionis Domini Rudolfi, Romanorum Regis, Avi nostri, quarumdam libertatum emunitatum et Jurium dicti monasterii confirmacionem continentes nobis per ipsum Abbatem exhibitum approbare, Innovare et confirmare dignaremur de gracia speciali. cuius quidem privilegii tenor per omnia talis est ... Rudolfus etc. (siehe die Urkunde vom 4. November 1279). Nos itaque Fridericus Dux predictus pro reverencia divina supradicti Abbatis et conventus supplicationibus favorabiliter inclinati prenotatum privilegium ipsis et suo monasterio Approbamus, Innovamus et presentis scripti patrocinio inperpetuum confirmamus. Nulli ergo omnino hominum liceat hanc nostre approbacionis, Innovacionis et confirmacionis paginam infringere vel ei ausu aliquo temerario contraire. Quod qui secus adtemptare presumpserit gravem se nostre indignacionis offensam et penas interpositas se noverit incurrisse. In cujus rei testimonium nostrum sigillum duximus presentibus appendendum. Datum apud Wiennam Anno domini Millesimo Trecentesimo Tercio decimo XII Kalendas Septembris.

Source Fulltext: OÖUB 5 (Wien 1868) S. 621, Nr. XXVIII (Anhang)