Wir Elspeth, von Gotes genaden weiln Chuniginne ze Rome, veriehen und tu^en chunt offenlich an diesem brief allen den, di in sehent oder ho^erent lesen, daz wier von der beweisung und von dem rat unsers gaistlichen vaters Byscholf wernhard von Pazzawe und mit wol verdahten mu^et ze Selgeret aller unser vordern und sunderlich unsers lieben herren und wiertes Chunich Albert von Rome und auch unser selber und auch unser nachkomcn sele und sunderlich zu einer widerlegung der veirtag, di an unserm sieden ze Halstat, daz wier mit unserm gu^et von wildem gepirig erbawen haben, ubergangen und zebrochen werdent mit arbeit, der man doch ze no^et niht enberen mag, unser almu^esen von dem vorgenanten sieden den gaistlichen leuten, dem Abt und dem Convent datz Chremsmunster mit getailet und gegeben haben, also daz in unser Phleger oder Amptleut ze Halstat alle Jar an unser frowen tag als si (verschied) geboren ist, dreizzich fu^eder du^erres Saltzes geben sullen und daz selbe Saltz sol in an unser Mauttestat ze Gmunden ledichlich an Mautte fu^er gen. Wer aber daz in unser phleger oder amptleut daz vorgenant Saltz an dem vorgenanten tag niht geben, so gebieten wir ernstlich bei ur sern hulden unsern Pu^erchleuten ze Halstat, daz sie dehain Saltz ze Halstat u^ez fu^eren lazzen untz daz daz vorgenant Saltz dem vorgenanten gotshaus verrihtet werde. Ez sol auch der vorgenant abt alle Jar an sand Phylippes tage seinem Convent ein halbes phunt wienner phenning geben ze pezzerung an ir phru^ent von dem vorgenanten Saltz, daz si dar umb des selben tages unsers vorgenanten wiertes der an dem selben tag verschaiden ist und unser vordern und nach chomen und auch unser selber, swenne wir niht sein, Jartag begên mit vigilien, mit selmessen und mit andern gotlichen sachen. Und dar u^eber, datz unser vorgeschriben gab und freiung dem vorgenanten abt und dem Convent ze Chremsmunster stete und unzebrochen beleibe von uns und unsern nachchomen, haben wir in disen prief gegeben versigelten mit unserm Insigel. Der ist geben datz Newenburch, do man zalt von Christes gebu^erd dreutzehen Hundert Jar in dem dreutzehenten Jar an unser frowen tag ze der Liehmisse.

Source Fulltext: OÖUB 5 (Wien 1868) S. 618-619, Nr. XXV (Anhang)